ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ បានបំភ្លឺថាក្រសួងគ្មានរថយន្តម៉ាកLexus 470 ពណ៌ស្ករពាក់ស្លាកលេខរដ្ឋ17 2-0731 ស្ថិតក្នុងចំណុះក្រសួងកសិកម្ម ដូចដែលវិទ្យុបរទេសក្រៅស្រុកមួយផ្សព្វផ្សាយថាអង្គការខុមហ្វែ្រលបានឃើញថារថយន្តនោះត្រូវបានយកទៅប្រើប្រាស់ដើម្បីឃោសនាការបោះឆ្នោតឱ្យគណបក្សប្រជាជនកម្ពុជាឡើយ។

ក្នុងលិខិតបំភ្លឺនៅថ្ងៃទី១៣ ខែកក្កដា ឆ្នាំ២០២៣ ក្រសួងកសិកម្មបានសរសេរដូច្នេះថា៖« ក្រសួងកសិកម្ម រុក្ខាប្រមាញ់ និងនេសាទ សូមបំភ្លឺជូនសាធារណជនឱ្យបានជ្រាបថា ទាំងរថយន្តម៉ាកLexus 470 ពណ៌ស្ករ ទាំងស្លាកលេខរដ្ឋ17 2-0731 ពុំមាននៅក្នុងបញ្ជីសារពើភណ្ឌរបស់អង្គភាពណាមួយ ចំណុះក្រសួងកសិកម្ម រុក្ខាប្រមាញ់ និងនេសាទទេ»។

ក្រសួងកសិកម្មបានចាត់ទុករថយន្តដែលស្លាកលេខរដ្ឋ17 2-0731 នោះជារថយន្តដែលប្រើប្រាស់ស្លាកលេខរដ្ឋក្លែងក្លាយ ហើយក្រសួងស្នើឱ្យអាជ្ញាធរមានសមត្ថកិច្ចស្រាវជ្រាវស្វែងរកអ្នកក្លែងបន្លំមកទទួលខុសត្រូវចំពោះមុខច្បាប់។

តាមបទបញ្ជា និងនីតិវិធីសម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ របស់គណៈកម្មាធិការជាតិរៀបចំការបោះឆ្នោត(គ.ជ.ប) បានបញ្ជាក់ឱ្យដឹងថា ហាមប្រើប្រាស់ថវិកា សម្ភារ មធ្យោបាយដឹកជញ្ជូនដែលជាសម្បត្តិរបស់រដ្ឋដើម្បីយកទៅឃោសនាបោះឆ្នោតឱ្យគណបក្សនយោបាយណាមួយ ឬបេក្ខជនណាម្នាក់ និងហាមប្រើប្រាស់មធ្យោបាយដឹកជញ្ជូនដែលជាសម្បត្តិរបស់រដ្ឋដើម្បីដឹកជញ្ជូនអ្នកបោះឆ្នោតទៅកាន់ការិយាល័យបោះឆ្នោត។ ប្រភេទយានយន្តដែលត្រូវហាម មានដូចជាម៉ូតូ ឬរថយន្តដែលមានស្លាកលេខរដ្ឋ ឬអក្សររាជការ នគរបាល ខេមរភូមិន្ទ និងរាជរដ្ឋាភិបាល៕